Mayasabha Trailer: దేవా కట్టా ‘మయసభ’ ట్రైలర్ విడుదల..!
Mayasabha Trailer: విభిన్నమైన మరియు ఆకర్షణీయమైన కంటెంట్ను ప్రేక్షకులకు అందించడంలో ముందుండే ఓటీటీ ప్లాట్ఫామ్ సోనీ లివ్, ఇప్పుడు ‘మయసభ’ అనే పొలిటికల్ థ్రిల్లర్ వెబ్సిరీస్తో ముందుకు రాబోతోంది. “రైజ్ ఆఫ్ ది టైటాన్స్” అనే ట్యాగ్లైన్తో రూపొందిన ఈ సిరీస్, సీనియర్ దర్శకుడు దేవా కట్టా దర్శకత్వంలో తెరకెక్కింది. ఈ వెబ్సిరీస్ ఆగస్టు 7 నుంచి సోనీ లివ్లో స్ట్రీమింగ్ కానుంది.
ఆది పినిశెట్టి, చైతన్య రావు, దివ్య దత్తా, సాయికుమార్, శత్రూ, శ్రీకాంత్ అయ్యంగార్, తన్య రామచంద్రన్, రవీంద్ర విజయ్ వంటి వారు ఈ ‘మయసభ’ సిరీస్లో కీలక పాత్రల్లో నటిస్తున్నారు.
దర్శకుడు దేవా కట్టా మాట్లాడుతూ, ఆంధ్రప్రదేశ్ రాజకీయాల్లో చరిత్ర సృష్టించిన నాయకులు చంద్రబాబు నాయుడు, వైఎస్ రాజశేఖర్ రెడ్డి మధ్య ఉన్న స్నేహం, ఆ తర్వాత వారిద్దరి మధ్య ఏర్పడిన రాజకీయ వైరాన్ని ఈ కథకు ప్రేరణగా తీసుకున్నట్లు తెలిపారు. అయితే, ఇది పూర్తిగా కల్పిత కథ అని, కొన్ని సంఘటనలు మాత్రం కాల్పనికంగా మలచబడ్డాయని ఆయన స్పష్టం చేశారు. ఒకే లక్ష్యంతో రాజకీయాల్లోకి అడుగుపెట్టిన ఇద్దరు స్నేహితులు, ఆ తర్వాత ఎలా దారి మార్చుకుని విడిపోయారనే అంశాన్ని ఈ సిరీస్ బలంగా చూపుతుందని ఆయన అన్నారు.
తాజాగా విడుదలైన ‘మయసభ’ ట్రైలర్ పలు సంచలనాత్మక డైలాగ్లతో సోషల్ మీడియాలో దుమారం రేపుతోంది. ఇద్దరు స్నేహితులు రాజకీయ ప్రత్యర్థులుగా ఎలా మారారనే కీలక అంశం చుట్టూ ఈ వెబ్ సిరీస్ కథనం అల్లుకుంది. ట్రైలర్లోని సన్నివేశాలు, డైలాగ్లు ఆకట్టుకునేలా ఉన్నాయి. ఇద్దరు గొప్ప స్నేహితుల మధ్య ఉండే స్నేహం, మానసిక సంఘర్షణ, వారి రాజకీయ ప్రయాణంలో ఎదుర్కొన్న పరిస్థితులను భావోద్వేగంగా ఈ వెబ్సిరీస్లో ఆవిష్కరించినట్లు తెలుస్తోంది.
పొలిటికల్ బ్యాక్డ్రాప్లో తెరకెక్కిన ఈ వెబ్సిరీస్ తెలుగు, హిందీ, తమిళం, మలయాళ భాషల్లో సోనీలివ్ ఒరిజినల్స్లో ఆగస్టు 7 నుండి స్ట్రీమింగ్ కానుంది. ఇటీవల విడుదలైన టీజర్ సోషల్ మీడియాలో మంచి స్పందన పొందగా, తాజాగా విడుదలైన ట్రైలర్ ప్రేక్షకులలో మరింత ఆసక్తిని రేకెత్తించింది.