Fahadh Faasil: ఫాహద్ ఫాజిల్ ‘డోంట్ ట్రబుల్ ది ట్రబుల్’ షూటింగ్ షురూ.. బాహుబలి నిర్మాతల ప్రతిష్టాత్మక ప్రాజెక్ట్..
Fahadh Faasil: మలయాళ అగ్ర నటుడు, విలక్షణమైన పాత్రలతో దేశవ్యాప్తంగా ప్రేక్షకులను మెప్పిస్తున్న ఫాహద్ ఫాజిల్ హీరోగా నటిస్తున్న ప్రతిష్టాత్మక చిత్రం ‘డోంట్ ట్రబుల్ ది ట్రబుల్’ ఆదివారం అధికారికంగా షూటింగ్ను ప్రారంభించింది. ఒక థ్రిల్లర్ ఫాంటసీ ఎంటర్టైనర్గా రూపొందుతున్న ఈ సినిమాకు శశాంక్ యేలేటి దర్శకత్వం వహిస్తున్నారు.
ఈ భారీ ప్రాజెక్ట్ను ప్రముఖ నిర్మాణ సంస్థలు ఆర్కా మీడియా వర్క్స్, షోయింగ్ బిజినెస్ సంయుక్తంగా నిర్మిస్తున్నాయి. ‘బాహుబలి’ వంటి దృశ్య కావ్యాన్ని అందించిన శోభు యార్లగడ్డ, ప్రసాద్ దేవినేనితో పాటు, ఎస్.ఎస్.కార్తికేయ ఈ చిత్రానికి నిర్మాతలుగా వ్యవహరిస్తున్నారు.
తాజాగా ప్రారంభమైన ఈ చిత్రం షూటింగ్లో ఫాహద్ ఫాజిల్ పాల్గొన్నారు. ఈ సందర్భంగా మేకర్స్ సినిమా ప్రకటనతో పాటు సెట్లోని స్టిల్స్ను మీడియాకు విడుదల చేశారు. ఫాహద్ ఫాజిల్, దర్శకుడు శశాంక్, నిర్మాత ఎస్.ఎస్.కార్తికేయ కలిసి ఉన్న ఫోటోలు ప్రస్తుతం సోషల్ మీడియాలో వైరల్ అవుతున్నాయి.
నవంబర్ 8వ తేదీ వరకు తొలి షెడ్యూల్ కొనసాగనున్నట్లు నిర్మాతలు తెలిపారు. ఈ షెడ్యూల్లో సినిమాకు అత్యంత కీలకమైన సన్నివేశాలను చిత్రీకరించనున్నట్లు తెలుస్తోంది. ‘పుష్ప’ చిత్రం తర్వాత మరోసారి తెలుగు నిర్మాణ సంస్థతో ఫాహద్ ఫాజిల్ జతకట్టడం ఈ సినిమాపై ప్రేక్షకుల్లో భారీ అంచనాలను పెంచుతోంది.
సంగీత దర్శకుడిగా కాలభైరవ ఈ చిత్రానికి బాణీలు అందిస్తున్నారు. అన్నీ అనుకున్న ప్రకారం జరిగితే, ఈ ప్రతిష్టాత్మక చిత్రాన్ని వచ్చే ఏడాది (2025) ద్వితీయార్థంలో ప్రపంచవ్యాప్తంగా విడుదల చేయాలని నిర్మాతలు లక్ష్యంగా పెట్టుకున్నారు. ఫాహద్ ఫాజిల్ విలక్షణ నటన, ప్రతిభావంతులైన సాంకేతిక బృందం కలయికతో వస్తున్న ఈ సినిమా ప్రేక్షకులకు సరికొత్త అనుభూతిని ఇవ్వడం ఖాయమని సినీ వర్గాలు అంచనా వేస్తున్నాయి.