Michael: కింగ్ ఆఫ్ పాప్ తిరిగొచ్చాడు.. మైఖేల్ జాక్సన్ బయోపిక్ ‘మైఖేల్’ టీజర్ విడుదల
Michael: సంగీత ప్రపంచాన్ని ఏలిన లెజెండరీ గాయకుడు, మైఖేల్ జాక్సన్ జీవిత చరిత్ర ఆధారంగా తెరకెక్కుతున్న ప్రతిష్టాత్మక చిత్రం ‘మైఖేల్’ నుండి మేకర్స్ తాజాగా టీజర్ను విడుదల చేశారు. ఎంతో ఆసక్తిగా ఎదురుచూస్తున్న ఈ సినిమా టీజర్, ప్రపంచవ్యాప్తంగా ఉన్న అభిమానుల్లో ఉత్సాహాన్ని అమాంతం పెంచింది.
ఈ బయోపిక్లో మైఖేల్ జాక్సన్ టైటిల్ పాత్రను అతడి మేనల్లుడు జాఫర్ జాక్సన్ పోషిస్తున్న సంగతి తెలిసిందే. జాఫర్, మైఖేల్ జాక్సన్ సోదరుడు జెర్మైన్ జాక్సన్ కుమారుడు. టీజర్లో జాఫర్ లుక్, బాడీ లాంగ్వేజ్, ముఖ్యంగా అతని ఐకానిక్ డ్యాన్స్ మూమెంట్స్ అచ్చం కింగ్ ఆఫ్ పాప్ను పోలి ఉండటం అభిమానులను విశేషంగా ఆకట్టుకుంటోంది. జాఫర్ తన పెదనాన్న పాత్రలో జీవించాడని, అతని ట్రాన్స్ఫర్మేషన్ అద్భుతంగా ఉందని నెటిజన్లు ప్రశంసల వర్షం కురిపిస్తున్నారు.
ఈ ప్రతిష్టాత్మక బయోపిక్ను ‘ట్రైనింగ్ డే’, ‘ఈక్వలైజర్’ వంటి యాక్షన్ చిత్రాల దర్శకుడు ఆంటోయిన్ ఫుక్వా తెరకెక్కిస్తున్నారు. ఆస్కార్ అవార్డు విజేత గ్రాహమ్ కింగ్ ఈ భారీ ప్రాజెక్ట్కు నిర్మాణ బాధ్యతలు వహిస్తున్నారు. ప్రపంచస్థాయి హాలీవుడ్ ప్రముఖులు ఈ ప్రాజెక్ట్లో భాగం కావడంతో సినిమా స్థాయిపై అంచనాలు మరింత పెరిగాయి.
మైఖేల్ జాక్సన్ జీవితం ఎంత గొప్పదో, అంతే వివాదాస్పదంగా కూడా సాగింది. ముఖ్యంగా ఆయన బాల్యంలో లైంగిక వేధింపుల ఆరోపణలు, వ్యక్తిగత జీవితంలోని కొన్ని అసాధారణ అంశాలు ప్రపంచవ్యాప్తంగా చర్చకు దారితీశాయి. ఈ నేపథ్యంలో బయోపిక్లో ఈ సున్నితమైన, వివాదాస్పద అంశాలను దర్శకుడు ఆంటోయిన్ ఫుక్వా ఎలా చూపిస్తారు? అనే విషయంపై హాలీవుడ్లో ఉత్కంఠ నెలకొంది.
ఈ చిత్రం మైఖేల్ జాక్సన్ జీవితంలోని అన్ని కోణాలను నిష్పక్షపాతంగా ఆవిష్కరించాలని అభిమానులు కోరుకుంటున్నారు. ‘మైఖేల్’ చిత్రం ప్రపంచవ్యాప్తంగా ఏప్రిల్ 24, 2026న ప్రేక్షకుల ముందుకు రానుంది. ఈ టీజర్తో సినిమా విడుదల తేదీపై ఆసక్తి మరింత పెరిగింది.