Ravi Teja: ట్విట్టర్ అంటే అసహ్యం అంటూ రవితేజ కామెంట్.. ‘మాస్ జాతర’ టైటిల్పై ఏమన్నారంటే?
Ravi Teja: మాస్ మహారాజా రవితేజ నటిస్తున్న తాజా చిత్రం ‘మాస్ జాతర’ విడుదలకు సిద్ధమవుతున్న నేపథ్యంలో, ఈ సినిమాకు సంబంధించిన ఆసక్తికర విషయాలు వెలుగులోకి వచ్చాయి. అక్టోబర్ 31న థియేటర్లలో విడుదల కానున్న ఈ చిత్రానికి సంబంధించిన టైటిల్ను స్వయంగా రవితేజనే సూచించారని దర్శకుడు భాను భోగవరపు తెలిపారు.
సరికొత్త మాస్ ఎలిమెంట్స్తో రవితేజను రైల్వే పోలీస్ పాత్రలో పరిచయం చేస్తున్న ఈ చిత్రంతో భాను భోగవరపు దర్శకుడిగా పరిచయమవుతున్నారు. ఇటీవల ఓ ఇంటర్వ్యూలో ఆయన మాట్లాడుతూ, కథ వినగానే రవితేజ చాలా ఉత్సాహం చూపించారని, కథలోని మాస్ అంశాలు, పవర్ఫుల్ పాత్ర కారణంగా వెంటనే ‘మాస్ జాతర’ అనే టైటిల్ను సూచించారని వెల్లడించారు. ఆ టైటిల్ తమకు కూడా నచ్చడంతో అదే ఖరారు చేశామన్నారు.
అయితే, సినిమా క్యాప్షన్ “మనదే ఇదంతా” మాత్రం భాను సొంత క్రియేటివిటీ అని, మొదట్లో రవితేజ దీనిని తిరస్కరించినా, “ఒక్కసారి వేసి చూద్దాం, నచ్చకపోతే తీసేస్తాం” అని తాను చెప్పడంతో ఆయన అంగీకరించారని, చివరకు ఈ క్యాప్షన్కు కూడా గ్రీన్ సిగ్నల్ ఇచ్చారని దర్శకుడు చెప్పారు. ఈ సినిమాలో రవితేజ యాస, భాష, బాడీ లాంగ్వేజ్ అన్నీ కొత్తగా ఉంటాయని, ప్రేక్షకులకు మరో పవర్ఫుల్ మాస్ అటిట్యూడ్ చూపించనున్నామని ఆయన తెలిపారు. ఈ చిత్రంలో శ్రీలీల హీరోయిన్గా నటిస్తోంది.
ఇదిలా ఉండగా, ఇటీవల విడుదలైన ‘ఓలే ఓలే’ పాటలోని కొన్ని పదాలపై సోషల్ మీడియాలో ట్రోలింగ్ జరిగిన విషయం తెలిసిందే. దీనిపై రవితేజ స్పందిస్తూ, పాటలోని కొన్ని లైన్స్ విని తప్పుపట్టడం సరికాదని, సినిమా కథ డిమాండ్ను బట్టే ఆ పాటను పెట్టడం జరిగిందని వివరణ ఇచ్చారు. సినిమా మొత్తం చూస్తే, ఆ పాట ప్రాధాన్యత అందరికీ అర్థమవుతుందని మాస్ మహారాజా పేర్కొన్నారు.
అలాగే, రవితేజ సోషల్ మీడియా వేదికల గురించి ఆసక్తికర వ్యాఖ్యలు చేశారు. తనకు ఇన్స్టాగ్రామ్ రీల్స్, యూట్యూబ్ షార్ట్ వీడియోలపై ఆసక్తి ఉందని, అయితే ట్విట్టర్ (X) మాత్రం అస్సలు ఇష్టం లేదని స్పష్టం చేశారు. “అక్కడంతా నెగెటివ్ బ్యాచ్ ఉంటుంది. అందుకే నేను ట్విట్టర్లో యాక్టివ్గా ఉండను” అని ఆయన తేల్చి చెప్పారు. ఈ వ్యాఖ్యలు సోషల్ మీడియాలో వైరల్గా మారాయి. రవితేజ నటిస్తున్న ఈ కొత్త చిత్రంపై అంచనాలు భారీగా ఉన్నాయి.