Saare Jahan Se Accha: ఆకట్టుకుంటున్న ‘సారే జహా సే అచ్ఛా’ ట్రైలర్..!
Saare Jahan Se Accha: బాలీవుడ్ నటుడు, స్కామ్ 1992 వెబ్సిరీస్ ఫేమ్ ప్రతీక్ గాంధీ ప్రధాన పాత్రలో నటిస్తున్న స్పై థ్రిల్లర్ వెబ్ సిరీస్ ‘సారే జహా సే అచ్ఛా’ ట్రైలర్ విడుదలైంది. ప్రముఖ ఓటీటీ ప్లాట్ఫామ్ నెట్ఫ్లిక్స్లో స్వాతంత్ర్య దినోత్సవ కానుకగా ఆగస్టు 13 నుంచి ఈ సిరీస్ స్ట్రీమింగ్ కానుంది. తాజాగా సోమవారం విడుదల చేసిన ఈ ట్రైలర్, సిరీస్పై అంచనాలను భారీగా పెంచుతోంది. “ఈసారి యుద్ధం సరిహద్దుల్లో కాదు.. మన ఆలోచనలతో చేయాలి. భారత్ను ఒక అడుగు ముందుంచడానికి సిద్ధంగా ఉండాలి” అనే శక్తివంతమైన డైలాగ్తో ట్రైలర్ను విడుదల చేయడం ఆసక్తిని రేకెత్తిస్తోంది.
ఎత్తులకు పైఎత్తులతో ఉత్కంఠగా..
1970ల నాటి ఉద్రిక్త పరిస్థితుల నేపథ్యంలో ఈ కథ సాగుతుంది. ప్రపంచం అణుయుద్ధం అంచున ఉన్న సమయంలో, పాకిస్థాన్లో అణు కార్యక్రమాన్ని నిర్వీర్యం చేసే అత్యంత ప్రమాదకరమైన మిషన్పై భారత ‘రా’ (రీసెర్చ్ అండ్ అనాలిసిస్ వింగ్) ఏజెంట్ విష్ణు శంకర్ (ప్రతీక్ గాంధీ) వెళ్తాడు. శత్రు దేశంలో అడుగుపెట్టిన విష్ణు, పాకిస్థాన్ ఐఎస్ఐ ఏజెంట్ ముర్తాజా మాలిక్ను ఎలా ఎదుర్కొన్నాడు? అతని ఎత్తులకు పైఎత్తులు వేస్తూ, దేశ భద్రతను ఎలా కాపాడాడు? అన్నదే ఈ సిరీస్ కథాంశం. ఈ క్రమంలో వచ్చే యాక్షన్, థ్రిల్లింగ్ సన్నివేశాలు ఊపిరి బిగపట్టేలా ఉన్నాయి.
పొరపాట్లకు తావులేని ప్రపంచం..
ఈ సిరీస్లో తన పాత్ర గురించి ప్రతీక్ గాంధీ మాట్లాడుతూ.. “విష్ణు శంకర్ ప్రపంచంలో పొరపాట్లకు తావులేదు. అతని ప్రతి కదలిక ఒక వ్యూహం, ప్రతి భావోద్వేగం నియంత్రణలో ఉంటుంది. దేశం కోసం అదృశ్యంగా పోరాడే సైనికుడి మానసిక సంఘర్షణ నన్ను ఈ పాత్ర వైపు ఆకర్షించింది” అని పేర్కొన్నారు. సుమిత్ పురోహిత్ దర్శకత్వం వహించిన ఈ సిరీస్లో తిలోత్తమ షోమ్, కృతిక కమ్రా, సన్నీ హిందూజా, రజత్ కపూర్ వంటి ప్రముఖ నటులు కీలక పాత్రలు పోషించారు. గూఢచర్యం మాత్రమే కాకుండా, త్యాగం, విధేయత, దేశభక్తి వంటి అంశాలతో ఈ సిరీస్ ప్రేక్షకులను ఆకట్టుకోనుంది.