Bhaag Saale Movie Review : నటీనటులు : శ్రీ సింహ కోడూరి, నేహా సొలంకి, రాజీవ్ కనకాల, జాన్ విజయ్, వర్షిణి సౌందర్ రాజన్, నందిని రాయ్, వైవా హర్ష, సత్య, సుదర్శన్, పృథ్వీ రాజ్ తదితరులు
సినిమాటోగ్రఫీ : రమేష్ కుషేందర్
మ్యూజిక్ : కాల భైరవ
నిర్మాతలు : అర్జున్ దాస్యన్, యష్ రంగినేని, కళ్యాణ్ సింగనమల
కథ, కథనం, దర్శకత్వం : ప్రణీత్ బ్రహ్మాండపల్లి
విడుదల తేదీ : జూలై 7, 2023
ప్రముఖ సంగీత దర్శకుడు, అకాడమీ అవార్డు విజేత ఎం.ఎం.కీరవాణి చిన్నకుమారుడు శ్రీసింహా హీరోగా నిలదొక్కుకునే ప్రయత్నం చేస్తున్నారు. పెద్దకుమారుడు కాలభైరవ ఒకవైపు సంగీత దర్శకుడిగా రాణిస్తుంటే.. శ్రీసింహా హీరోగా నిరూపించుకోవాలని ప్రయత్నిస్తున్నారు. ఈ ప్రయత్నంలో భాగంగా ఆయన చేసిన తాజా చిత్రం ‘భాగ్ సాలే’. ఈ రోజు ప్రేక్షకుల ముందుకు వచ్చిన ఈ చిత్రం ఎలా ఉందో చూద్దాం..
కథ :
అర్జున్ (శ్రీ సింహ కోడూరి) షెఫ్. అయితే, తాను రిచ్ పర్సన్ అని అబద్ధం చెప్పి మాయ (నేహా సోలంకి)ని ప్రేమలో పడేస్తాడు. ఆ అమ్మాయి తండ్రిని శామ్యూల్ (జాన్ విజయ్) కిడ్నాప్ చేస్తాడు. ఓ డైమండ్ రింగ్ (షాలి సుకా గజా – ఆ ఉంగరం పేరు) ఎక్కడని అడుగుతాడు. ఆ రింగ్ తీసుకొచ్చి ప్రపోజ్ చేస్తే పెళ్ళికి ఓకే చెబుతానని నళిని (నందిని రాయ్) కండిషన్ పెడుతుంది.
అసలు, పాతిక కోట్ల విలువ చేసే ఆ ఉంగరం కథ ఏమిటి? మాయ ప్రేమ కోసం అర్జున్ ఏం చేశాడు? అర్జున్ చెప్పిన అబద్ధాలు తెలిసిన తర్వాత మాయ ఏం చేసింది? మధ్యలో రమ్య (వర్షిణి సౌందర్ రాజన్), పోలీస్ ప్రామిస్ రెడ్డి (స్వామి రారా సత్య) దంపతుల కథ ఏమిటి? చివరకి, రింగ్ ఎవరి చేతికి చేరింది? అనేది మిగతా సినిమా.
రివ్యూ :
ఒక్కోసారి క్రైమ్ కామెడీ చిత్రాలకు బలం, బలహీనత అందులోని క్రైమ్ అవుతుంది. ‘భాగ్ సాలే’లో క్రైమ్ కంటే మధ్యలో వచ్చే కామెడీ సన్నివేశాలు బావున్నాయి. ఆ సీన్లను దర్శకుడు ప్రణీత్ డీల్ చేసిన విధానం కూడా బావుంది. కామెడీ చూపిన గ్రిప్ అతడు థ్రిల్లింగ్ స్క్రీన్ ప్లే మీద చూపించడంలో ఫెయిల్ అయ్యాడు. ‘భాగ్ సాలే’ స్టార్టింగ్ నుంచి ఎండింగ్ వరకు రోలర్ కోస్టర్ రైడ్గా అనిపిస్తుంది.
కథలో ఎక్కువ ట్రాక్స్ ఉండటంతో చివరకు వచ్చేసరికి కాస్త కంగాళీ అయ్యింది. వర్షిణి, సత్య సన్నివేశాలు నిడివి పెంచడానికి తప్ప కథకు అవసరం లేదనిపిస్తుంది. అయితే… సత్య డైలాగులు నవ్విస్తాయి. ‘భాగ్ సాలే’లో మెయిన్ హైలెట్ అంటే కాల భైరవ సంగీతం! పాటలు బావున్నాయి. ట్రెండీగా, పెప్పీగా ఉండేలా చూసుకున్నారు. బ్రేకప్ తరహా సాంగ్ ఆకట్టుకుంది. కెమెరా వర్క్ బావుంది.
ఎడిటింగ్ ఇంకా షార్ప్ & గ్రిప్పింగ్ గా ఉంటే బావుండేది. నిర్మాణ విలువలు బావున్నాయి. ఖర్చు విషయంలో అర్జున్ దాస్యన్, యష్ రంగినేని, కళ్యాణ్ సింగనమల రాజీ పడలేదు. సినిమాలో లొకేషన్స్ ఎక్కువ, ఆర్టిస్టులు ఎక్కువ మంది! కాన్సెప్ట్ ఓరియెంటెడ్ సినిమా కోసం అంత మందిని సెటప్ చేయడం అంటే మామూలు విషయం లేదు. నిర్మాతలు కథను బలంగా నమ్మడంతో ఖర్చు చేసినట్టు అనిపిస్తుంది.
నటీనటులు ఎలా చేశారంటే..
శ్రీ సింహ కోడూరి మరోసారి పక్కింటి అబ్బాయిగా ఒదిగిపోయాడు. రెగ్యులర్ హీరోయిన్ పాత్రలో నేహా సోలంకి రొటీన్ యాక్టింగ్ చేసింది. తమిళ నటుడు జాన్ విజయ్, ‘వైవా’ హర్ష కాంబినేషన్… వాళ్ళిద్దరి డైలాగులు ఫన్ క్రియేట్ చేశాయి. శామ్యూల్ పాత్రలో జాన్ విజయ్ వేరియేషన్స్ చూపించారు. రాజీవ్ కనకాల, పృథ్వీరాజ్, ఆర్జే హేమంత్ తదితరులు ఓకే.
రేటింగ్ : 2.5/5
ట్యాగ్ లైన్ : ఎలాంటి అంచనాలు లేకుండా కామెడీ కోసం అయితే ‘భాగ్ సాలే’ ఓకే..